INTRODUSSION
O Centro Latte Rapallo o l’é presente da ben
ciù de 50 anni [çinquant’anni] into campo do mangiâ pe via da
produssion e distribussion do læte e di seu derivæ. Ancheu o l’é
a-i primmi pòsti in Ligùria pe-a comercializassion do læte, di
formaggi e di çibbi freschi, merçe ch’a vegne distribuîa in ciù
de 3500 [treimilla çinque çento] ponti de vendita tra grendi
magazin e buteghe tradissionali.
Da-o 1999, [mille neuveçento novant’e neuve] dopo esise misso
insemme a-a Centrale del Latte di Torino, a-a Centrale del Latte
di Vicenza e a parteçipâ Frascheri, o Centro Latte Rapallo o l’é
intròu a fâ parte de ’n importante pòlo di mangiæ freschi,
estéiso tra diverse regioin, ch’o l’é presente in ciù de 8.000 [euttomilla]
buteghe e de 1.250 [mille duxento çinquanta] ponti de vendita da
grande distribussion in Piemonte, Ligùria e Véneto.
A STÖIA E A PRODUSSION
O prinçipio
O l’incomensa into 1954, [mille neuveçento çinquant’e quattro]
inte ’na grassiosa frassion in scê altûe de Rapallo, o primmo
capìtolo da stöia do Centro Latte Rapallo.
A cösa a parte quande a famiggia Macciavello a decidde de arvî
un centro picinetto pe-a produssion do læte, ’n’ativitæ fæta
quæxi tutta in famiggia e prinçipiâ acatando primma un servissio
de distribussion e pöi un impiànto ch’o pastorizava o læte
fresco e òu mettéiva inte botigge.
Inte pöchi anni, a ditta a consòlida a seu posission into mercòu
locale e a l’incontra un bon sucesso comerciale inta Provinsa de
Zena, specie into Gorfo do Tigùlio e inti comuin che gh’é in gîo.
Semmo into 1960 [mille neuveçento sciuscianta] quande, visto
quello ch’a l’avéiva otegnûo e con l’intrâ da Famiggia Figari
inta societæ, a ditta a cangia nomme in Macchiavello e Figari
Snc e a l’inàndia un programma de investimenti in impiànti e
tecnologîe pe fâ cresce a seu capaçitæ de produssion.
Coscì, into 1966 [mille neuveçento sciusciant’e sêi] vegne
instalòu un scistema, ’na gran novitæ pe quelli tempi, pe
confesionâ o læte con ’na bobinn-a a carton che, in pöco ciù de
dex’anni, a sostituiâ pe de longo o tradissionale scistema de
deuviâ botigge de veddro.
A STÖIA E A PRODUSSION
I anni de
l’espanscion comerciale
A partî da-o 1981, [mille neuveçento òtant’un] anno into quæ a
ditta a se trasforma into Centro Latte Rapallo Srl, parte un
cian pe rinovâ i impiànti, attuòu pe mezo de procedûe ötomatizæ
pe gestî o travaggio, pe alugâ a merçe inti magazin e pe lavâ e
röbe fæte coscì da acresce de ‘n bello pö a capaçitæ e o
rendimento da produssion.
Into 1990 [mille neuveçento novanta] o Centro Latte Rapallo o
l’attraversa un atro cangiamento da-o ponto de vista da
scistemassion da societæ: dòppo ese stæto acatòu da doe famigge
de imprenditoî zenéixi, o l’intra tra i asionisti da Centrale
del Latte di Torino con ’na quòta do 20%, [vinti pe çento] pe
pöi vegnî definitivamente ’na Societæ pe Asioin into 1993.
[mille neuveçento novant’e trei]
Sti cangiamenti formali di anni novanta van a brasetto con ’na
série de sucessi comerciali, ottegnûi sotta a guidda do Chicco
Luzzati, gràssie a ’na polìtica da produssion ch’a l’amiâva ben
ben avanti e basâ in sciô rispetto de promisse da qualitæ, da
freschessa, e do servìssio oferte scin da-o prinçìpio a-e seu
casann-e.
Inte sto mòddo chi, a produssion do Centro Latte Rapallo e o
marco “Latte Tigullio”, ch’o l’indentìfica tutta, son diventæ,
into cheu da gente, paròlle che veuan dî genuinitæ e attension
pe-e necessitæ di acatoei e, pe dîla con ciù respîo, de rispetto
pe-o çitadin e de un profondo ligamme co-o teritöio.
In palanche, o sucesso comerciale di anni ‘90 [novanta] o l’é
testimoniòu da-o fæto che, tra o 1990 [mille neuveçento novanta]
e o 2002 [doîmilla doî], e intræ de l’anno vegnan træ vòtte
tanto, da 11 [unze] a 42 [quarant’e doî] miliardi; che gh’é ’na
sempre ciù grande penetrassion da distribussion in sce tutto o
teritöio lìgure e che a quòta de mercòu a l’é arivâ a-o 40% [quaranta
pe çento] de tutto o teritöio locale.
A STÖIA E A PRODUSSION
A ditta into neuvo milénio
A tappa ciù recente de sto camin de sviluppo a l’é
l’integrassion de-e assioin do Centro Latte Rapallo con quelle
da Centrale del Latte di Torino. Nasce coscì into 1999 [mille
neuveçento novant’e neuve] a Centrale del Latte di Torino & C.,
’na ditta ch’a tegne e brille do pòlo interegionale specializòu
inti çibbi freschi e ultrafreschi con 92 [novant’e doî] milioin
de Euro de incasci consolidæ, 5 [çinque] stabilimenti pe-a
produssion e 240 [duxento quaranta] personn-e che ghe travàgian.
Pe via da contìnua espanscion do comèrcio, a Societæ lìgure l’à
inauguròu into 2001 [doî milla un] ’na neuva fàbrica pe-o
depòxito breve e longo da produssion, con sede ancon a Rapallo,
in localitæ San Pê (S. Pietro di Novella), in sce ’n’area de
oltre 1200 mq. [mille duxento metri quaddri]
Into 2004, [doî milla quattro] a 50 anni [çinquant’anni] da-a
seu costitussion, a ditta a l’é tra e ciù importanti in Ligùria
pe-a produssion e o comèrcio de 14 [quatòrze] lìnie de mangiæ
freschi e ultrafreschi, pe ’n totale de 90 [novanta] referense,
distribuîe ògni giorno apenn-a fæte pe mezo de ’n scistema de
distribussion bon a arivâ a tutte e gente e inti tutti i pòsti.
A PRODUSSION
Inovassion e diverscificassion
Da çinquant’anni, ricerça e voentæ d’atrovâ de longo a ciù neuva
e megio solussion caraterìzan a filosofîa di imprenditoî do
Centro Latte Rapallo.
In st’òttica chi, oltre a-a produssion e a-o comercio do læte
fresco – ch’o peu ese intrego, un pö scremòu, magro e de Ata
Qualitæ – ch’o l’é a parte ciù conscistente da produssion, o
Centro Latte Rapallo o l’à diverscificòu a seu attivitæ
inserindo neuve lìnie de produssion tra e cöse ch’o fâ.
O camin pe diverscificâ a produssion o l’à visto pe primma cösa
l’introdussion e o costante ingrandimento da lìnia di derivæ do
læte - panna, bitiro, budin, stracchin, prescinseua, fiordilatte,
richeutta, grann-a, ecc - e pöi l’intrâ de ben ben di çibbi
freschi comme euve, insalatte, verdûe e macedònie fresche.
Into 2004, [doî milla quattro] o Centro Latte Rapallo o
l’inserisce a neuva lìnia di mangiæ freschi confesionæ,
incomensando a prodûe da pasta fresca: Pansöti zenéixi, Ravieu
de Boraxe, Tròfie e Tortelin, preparæ con amô rispetando a megio
tradission lìgure.
A
COMUNICASSION
Fin da-o prinçìpio, o Centro Latte Rapallo o dà a mente con
speciale attension a-a comunicassion d’impréisa.
Unna comunicassion ch’a va ciù in là de sémplici finalitæ do
messaggio comerciale e ch’a proponn-e, da ’n lato, strumenti e
inissiative davei ligæ a-o teritöio e a-a comunitæ dove a ditta
a l’é inserîa e, da l’atro, a va verso de scelte creative in
graddo de dâ un elevòu valô artìstico a-e imàgini, gràssie a-a
capaçitæ e a l’abilitæ de tanti méistri famosi.
Inte numerose campagne publicitâie coscì comme inte
publicassioin fæte insemme a célebri artisti lìguri – tra i quæ
Lele Luzzati, Giorgio Tabet, Dario Bernazzoli – ò into finansiâ
ativitæ in sciô teritöio, o fî ch’o guida a comunicassion da
Societæ o l’é a riçerca de ’n rapòrto e de ’n parlâ costante con
tutti i quelli ch’en interessæ, segondo ’na lògica de dâ sempre
ciù informassion e servìssio a-a pròpia comunitæ.
Zóveni, sport, arte e cultûa: sti chi en i temi a-i quæ o Centro
Latte Rapallo o se dédica, da sempre, con grande impegno e
pascion.
Tra e inissiative sportive, van aregordæ i finanziamenti de
Vivicittà e Scuole in Pista, e o costante agiutto a-o Volley
Rapallo Tigullio, che son tra i ciù scignificativi interventi da
ditta.
Da no scordâ e tante propòste pe-i ciù piccinetti: da-i papê pe
mostrâ e spiegâ o tema de l’alimentassion a atre inissiative de
successo, tra e quæ “Camminando sulle acque”, “La città pulita”,
“In giro nel Centro Storico”, “Progettiamo la città”.
Verscion
zenéize de Franco Bampi
|
|
